Паважаны апазыцыянэр аказаўся агентам спэцслужбаў

Фота: PAP/Andrzej Rybczyński

Польскі Інстытут нацыянальнай памяці спыніў супрацоўніцтва з выдавецтвам “Рытм”, якое распачало сваю дзейнасьць яшчэ ў падпольлі ў часы камунізму. Стваральнік выдавецтва, шанаваны апазыцыянэр Марыян Катарскі, аказаўся насамрэч маёрам камуністычных спэцслужбаў Марыянам Пэнкальскім – піша газэта „Rzeczpospolita”.

Засакрэчаны агент Службы бясьпекі пасьля падзеньня камунізму спакойна зарэгістраваў сваё выдавецтва. Марыяна Катарсакага паважалі настолькі, што даверылі яго фірме выдаць першую кнігу Леха Валэнсы “Дарога надзеі”. Сярод кніг, якія яго фірма надрукавала на працягу 20 гадоў, былі й выданьні, прысьвечаныя гісторыі антыкамуністычнага супраціву.

У 70-я й 80-я гады камуністычныя спэцслужбы уводзілі ў апазыцыйныя колы сваіх агентаў пад відам грамадзкіх актывістаў і нават ксяндзоў. Былыя дзеячы антыкамуністычнай апазыцыі будуць патрабаваць, каб маёра Пэнкальскага-Катарсакга пазбавілі ўсіх узнагародаў і прэміяў, якія ён атрымаў у якасьці апазыцыянэра.

„Rzeczpospolita”/ап