Апалчэнцы Славянска пакуль ня хочуць адпускаць замежных назіральнікаў

Апалчэнцы Славянска пакуль ня маюць намеру адпускаць замежных ваенных назіральнікаў, якія знаходзіліся на ўсходзе Ўкраіны, таму што лічаць іх "шпіёнамі", заявіў на брыфінгу ў Славянску прадстаўнік мясцовага апалчэньня .

Гэтак званы народны мэр Славянска Вячаслаў Панамароў паведаміў напярэдадні, што прыхільнікі фэдэралізацыі спынілі на адным з блёкпастоў аўтобус зь меркавана прадстаўнікамі АБСЭ, якіх суправаджалі ўкраінскія афіцэры. Паводле яго слоў, у затрыманым аўтобусе было 12 чалавек, у чатырох зь якіх апалчэнцы падазраюць афіцэраў ўкраінскага Генштаба. Астатнія, як мяркуецца, былыя й дзеючыя афіцэры з краін Эўропы. Па заяве ўкраінскага боку, яны працавалі ў адпаведнасьці зь Венскім дакумэнтам 2011 года аб мерах умацаваньня даверу й бясьпекі.
Паводле словаў кіраўніка часовага ўрада гэтак званай Данецкай Народнай Рэспублікі Дзяніса Пушыліна, які прыехаў на перамовы, апалчэнцы падазраюць затрыманых у шпіянажы "на карысьць НАТО". Паводле сьцьвярджэньня актывістаў, у аўтобусе знаходзіліся чатыры грамадзяне Нямеччыны, а таксама па прадстаўніку Даніі, Польшчы, Балгарыі й Чэхіі.

"У дэлегацыі таксама былі афіцэры Генштаба Ўкраіны", - заявіў Пушылін, адзначыўшы, што апалчэнцы маюць намер абмяняць іх "на нашых палонных". Пушылін таксама запэўніў журналістаў, што з затрыманымі абыходзяцца добра.

Паводле інфармацыі МЗС Украіны, 21 красавіка на паўднёвы ўсход краіны прыбыла чарговая шматнацыянальная група ваенных назіральнікаў АБСЭ пад кіраўніцтвам Нямеччыны. Яна зьмяніла нідэрляндзкую групу, якая працавала там з 12 красавіка. У пятніцу паведамлялася, што з групай была страчана сувязь у Данецкай вобласьці. Пазьней МУС Украіны заявіла, што аўтобус з 13 пасажырамі, сярод якіх было сем прадстаўнікоў АБСЭ і пяць прадстаўнікоў узброеных сіл Украіны, быў спынены невядомымі на ўездзе ў Славянск.

паводле korrespondent.net/вс