Расейскі самалёт-выведнік над Польшчай

Прадстаўнік Міністэрства абароны Яцэк Сонта паведаміў, што рэгулярныя назіральныя палёты праходзяць у адпаведнасьці з палажэньнямі міжнароднай Дамовы па адкрытым небе. Польскія паветрнаыя сілы выконвалі аналягічныя палёты над Расеяй і Беларусьсю напрыканцы сакавіка і пачатку красавіка. Чарговы такі назіральны палёт над Расеяй і Беларусьсю плянуецца на чацьвёрты квартал 2014 г.

Расейская інспэкцыйная група складаецца з больш як дзесяці чалавек. Самалёт-выведнік Ан-30Б падчас перапынкаў у палётах стаіць у варшаўскім аэрапорце Акэнце.

Назіральныя палёты на падставе Дамовы па адкрытым небе адбываюцца са згоды краін і па прынцыпе ўзаемнасьці, з удзелам прадстаўнікоў краін, на чыёй тэрыторыі вядуцца назіраньні.

Дамова па адкрытым небе (Open Skies) дазваляе ўзаемны кантроль абараназдольнасьці і вайсковай дзейнасьці. Яна была падпісаная ў 1992 годзе ў Хельсінках. Польшча яе ратыфікавала ў 1995 годзе.

эб