Дачка ген. Андэрса атрымала пасьведчаньне сэнатара

Анна Марыя Андэрс (поль. Anna Maria Anders) ад кіроўнай партыі „Права й справядлівасьць” атрымала пасьведчаньне сэнатара й прынесла прысягу перад сьпікерам вышэйшай палаты польскага парлямэнту.

Андэрс паведаміла, што як сэнатар яна хоча ў першую чаргу прадстаўляць інтарэсы Польшчы й польскай абшчыны ў сьвеце, а таксама заахвочваць інвэставаць на Падляшшы.

„Гэты рэгіён мае патрэбу ў эканамічнай падтрымцы”, - сказала Анна Марыя Андэрс.

Яна дадала, што плянуе заняцца пытаньнем бясьпекі й разбудовы інфраструктуры ў паўночна-ўсходняй частцы краіны.

Дачка генэрала Андэрса атрымала мандат сэнатара ў выніку дадатковых выбараў у акрузе №59, якая ахоплівае частку Падляскага ваяводзтва.

Яна мае грамадзянства Польшчы, ЗША й Вялікабрытаніі. Нарадзілася ў 1950 годзе ў Лёндане.

З 2016 году Анна Марыя Андэрс зьяўляецца старшынёй Рады аховы памяці барацьбы й пакутніцтва і ўпаўнаважанай ураду па пытаньнях міжнароднага дыялёгу.

аз