Чубараў: Мы заклікаем ЭЗ увесьці эмбарга на нафту з Расеі

Прадстаўнікі Мэджліса крымскататарскага народа заклікаюць краіны ЭЗ узмацніць санкцыі супраць Расеі, у прыватнасьці разгледзець пытаньне аб часовым эмбарга на расейскую нафту.

Пра гэта ў эфіры hromadske.tv сказаў старшыня Мэджліса крымскататарскага народа Рэфат Чубараў.

«На фоне ўзмацненьня рэпрэсіяў супраць крымскіх татараў наша задача - зрабіць так, каб міжнародная супольнасьць схілялася да больш жорсткіх санкцыяў супраць Расеі», - сказаў ён.

Эўрапейскі парлямэнт мае намер правесьці дэбаты й прыняць рэзалюцыю аб парушэньні правоў крымскіх татараў з боку Расеі на сваім пасяджэньні 12 траўня. На парадку дня заплянаваны дэбаты па пытаньнях парушэньняў правоў чалавека, дэмакратыі й вяршэнства права адносна татараў у Крыме.

«Мы заклікаем да адключэньня банкаўскай сыстэмы SWIFT. Я таксама казаў пра тое, каб эўрапейскія краіны разглядалі пытаньне аб магчымым, хоць бы часовым, эмбарга на энерганосьбіты з Расеі, у прыватнасьці на нафту», - паведаміў Чубараў.

Нагадаем, ЭЗ назваў забарону Мэджліса атакай на правы крымскіх татараў.

hromadske.tv/дг