Польшча пратэстуе супраць выказваньня расейскага амбасадара

Міністэрства замежных справаў Польшчы заявіла, што Расея ня мае ніякіх прававых падстаў навязваць Польшчы спосаб і тэрмін завяршэньня расьсьледаваньня Смаленскай авіякатастрофы. Заява польскага МЗС - гэта адказ на інтэрвію, якое амбасадар Расеі Сяргей Андрэеў даў парталу Wirtualna Polska.

Паводле Міністэрства замежных спраў Польшчы, словы амбасадара - гэта спроба навязаць польскім сьледчым кірунак расьсьледаваньня. Апрача таго, выказваньне расейскага амбасадара сьведчыць пра тое, што Расея намерваецца надалей адтэрміноўваць выдачу абломкаў урадавага самалёта Ту-154М, якія зьяўляюцца ўласнасьцю Рэспублікі Польшча.

У інтэрвію парталу Wirtualna Polska расейскі амбасадар сказаў, між іншым, што расьсьледаваньне прычынаў крушэньня польскага ўрадавага самалёта, якое вядзецца ў Расеі, будзе працягвацца да таго часу, пакуль польскі бок не прызнае справаздачу МАК сапраўднай. Да таго часу абломкі Ту-154М ня будуць вернутыя ў Польшчу. Сяргей Андрэеў таксама дадаў, што Сьледчы камітэт Расеі павінен праверыць усе „новыя вэрсіі прычын катастрофы, новыя здагадкі, тлумачэньні й новыя пытаньні”, якія ўзьнікаюць у Польшчы.

аз