Мадрыд разьлічвае на кубінскія рэформы

Гішпанскія кампаніі спадзяюцца, што пасьля сьмерці Фідэля Кастра ўлады Кубы пачнуць эканамічныя рэформы, якія дапамогуць ім у працы на кубінскім рынку. Гішпанія зьяўляецца першым інвэстарам на Кубе й трэцім па ліку гандлёвым партнэрам Гаваны (пасьля Кітая й Вэнэсуэлы), паведамляе з Барсэлёны карэспандэнтка Польскага радыё.

Капіталаўкладаньні Гішпаніі на востраве – гэта амаль 45% замежных інвэстыцый на Кубе. Кампаніі з Ібэрыйскага паўвострава на Кубе зьяўляюцца ўладальнікамі гатэляў, банкаў і прадпрыемстваў харчовай прамысловасьці. У мінулым годзе ў Гаванскай міжнароднай ярмарцы-выставе ўдзел прымала 160 гішпанскіх кампаній.

Мэнаджары зь Гішпаніі зазначаюць, што эканамічная адліга на востраве пачалася ў 2014 годзе, аднак дзейнасьць замежных фірмаў надалей сустракаецца з рознага роду перашкодамі. Кубінскім рынкам, у прыватнасьці, зацікаўленыя гішпанскія транспартныя й будаўнічыя кампаніі, а таксама фірмы, якія працуюць у галіне аднаўляльных крыніц энэргіі.

вс