Алена Купчына абраная кіраўніком галоўнага палітычнага органа ЮНІДА

Пасол Беларусі ў Аўстрыі, пастаянны прадстаўнік рэспублікі пры міжнародных арганізацыях у Вене Алена Купчына (экс-віцэ-міністар МЗС Беларусі) абраная старшынёй 17-й сэсіі Генэральнай канфэрэнцыі Арганізацыі Аб'яднаных Нацый па прамысловым разьвіцьці (ЮНІДА).

Алена Купчына будзе выконваць абавязкі старшыні да наступнай чарговай сэсіі Генэральнай канфэрэнцыі ЮНІДА, якая адбудзецца ў 2019 годзе. Прадстаўнік Беларусі на пасаду кіраўніка сэсіі галоўных палітычных органаў унівэрсальных міжнародных арганізацый сыстэмы ААН абраны ўпершыню.

Генэральная канфэрэнцыя зьяўляецца найвышэйшым органам ЮНІДА, які вызначае кіруючыя прынцыпы й палітыку арганізацыі на найбліжэйшае двухгодзьдзе. Яна прымае праграму работы, рэгулярны й апэратыўны бюджэты, сочыць за эфэктыўным выкарыстаньнем фінансавых рэсурсаў ЮНІДА.

У 17-й Генэральнай канфэрэнцыі ўдзельнічае каля 200 дэлегацый дзяржаў – членаў арганізацыі, устаноў сыстэмы ААН, міжурадавых і няўрадавых арганізацый.

Падчас сэсіі будзе разгледжаная ініцыяваны Беларусьсю праект рэзалюцыі па ўстойлівым прамысловым разьвіцьці краін зь сярэднім узроўнем даходу.

Беларусь на працягу апошніх гадоў актыўна ўзаемадзейнічае з ЮНІДА практычна па ўсім спэктры дзейнасьці арганізацыі.

У цяперашні час ЮНІДА рэалізуе ў рэспубліцы праекты тэхнічнай дапамогі на агульную суму каля $2 млн. У якасьці пэрспэктыўных кірункаў супрацоўніцтва разглядаюцца пытаньні энэргаэфэктыўнасьці й экалягічнай бясьпекі ў прамысловасьці.

белта/вс