У Эўразьвязе гелій вырабляе толькі Польшча

Прыкладна 800 тысяч кубоў былі прададзеныя на ўнутраным рынку, усё астатняе – за мяжой.

Гелій зьяўляецца ключавым хімічным элемэнтам, які выкарыстоўваецца ў навуковых дасьледаваньнях і перадавых мэдыцынскіх тэхналёгіях.

Гэты газ незамянімы дзеля вытворчасьці высокатэхналягічных прылад, выкарыстоўваецца таксама ў ваенных ды касьмічных праектах.

Гелій зьяўляецца пабочным прадуктам перапрацоўкі прыроднага газу.

Польшча – адна з шасьці вытворцаў гелію ў сьвеце і адзіны ў Эўрапейскім Зьвязе.

Томаш Яскульскі, дырэктар аддзяленьня нафтагазавай кампаніі PGNiG у Адалянаве, дзе знаходзіцца ўстаноўка атрыманьня гелію, сказаў, што рэалізуецца ўвесь атрыманы газ.

Т.Яскульскі: Гелій немагчыма захоўваць працяглы час. У звадкаваным стане можна яго захоўваць 40-45 дзён. Яго неабходна аддзяліць, звадкаваць і даставіць заказчыку ў адносна кароткі час. Гелій таксама павінен быць хутка выкарыстаны.

Томаш Яскульскі падкрэсьлівае, што гелій выкарыстоўваецца ў шматлікіх галінах.

Т.Яскульскі: Найбольш вядомае нам выкарыстаньне – у паветраных шарыках, якія на розных мерапрыемствах запускаюць у неба. Гелій выкарыстоўваецца ў якасьці носьбіта пры нізкіх тэмпэратурах падчас магнітна-рэзананснай тамаграфіі, па сутнасьці, у кожным шпіталі. Гэты газ выкарыстоўваецца таксама ў газавых сумесях для дайвэраў, падчас лязэрнай зваркі розных прадметаў у гелевай абалонцы, дзеля праверкі шчыльнасьці розных прылад.

Найбуйнейшыя сусьветныя радовішчы знаходзяцца ў ЗША, Катары і Расеі. Гелій на сусьветны рынак пастаўляюць таксама Алжыр і Аўстралія. Доля Польшчы ў сусьветнай вытворчасьці гэтага газу складае каля 2 працэнтаў.

яс

Эфірны выпуск перадачы "Пульс польскай эканомікі" ў далучаным файле