Украінцы выказваюцца за далучэньне краіны да NATO

Больш за 40% украінцаў хацелі б, каб Украіна ўступіла ў Паўночнаатлянтычны альянс. Пра гэта сьведчаць вынікі апытаньня грамадзкай думкі, праведзенага Фондам „Дэмакратычныя ініцыятывы” й Кіеўскім міжнародным інстытутaм сацыялёгіі.

Украінскія ўлады заяўляюць, што далучэньне да NATO, гэта адна з асноўных задач разьвіцьця краіны.

Паводле апытаньня, 42% украінцаў лічаць, што сяброўства ў NATO, гэта лепшая гарантыя нацыянальнай бясьпекі. 35% падтрымлівае цяперашні статус сваёй дзяржавы. За альянс з Расеяй выказваецца толькі 6,4% рэспандэнтаў. 16% ня маюць канкрэтных меркаваньняў па гэтым пытаньні.

Калі б рэфэрэндум па пытаньні ўступленьня Ўкраіны ў NATO адбыўся цяпер, то ўдзельнічалі б у ім 63% апытаных, зь якіх 67% прагаласавалі б за ўступленьне краіны ў Паўночнаатлянтычны альянс.

Украіна імкнецца ўступіць у NATO. Украінскія ўлады рэфармуюць сваю армію, каб яна адпавядала стандартам альянсу.

Прэзыдэнт Пётр Парашэнка прадставіў у парлямэнце праект паправак у Канстытуцыю, якія накладаюць на прэзыдэнта, урад і парлямэнт абавязак імкнуцца да ўступленьня ў NATO й эўрапейскай інтэграцыі.

аз