Імпарт расейскіх нафтапрадуктаў у Беларусь скараціўся ў 100 разоў

Паводле падлікаў Нацыянальнага статыстычнага камітэту па выніках студзеня Беларусь імпартавала з Расеі ўсяго 3,6 тысячаў тон нафтапрадуктаў. Летась за аналягічны пэрыяд было імпартавана больш за 350 тысячаў тон.

Прычына такога падзеньня сталі новыя балянсы ўзаемных паставак нафты й нафтапрадуктаў, якія, у прыватнасьці, не прадугледжваюць ажыцьцяўленьня паставак бэнзіну, дызпаліва й мазуту. Раней Масква неаднаразова абвінавачвала Менск у рээкспарце расейскіх нафтапрадуктаў. У выніку ў Крамлі вырашылі адмовіцца ад паставак прадукцыі з нафту ў нашу краіну.

Імпарт расейскай нафты ў студзені склаў 1,55 мільёнаў тон, што на 0,5 % ніжэй паказьнікаў мінулага году. Пры гэтым кошт імпарту скараціўся да 529 мільёнаў даляраў ЗША (89 % ад узроўню кошту за студзень 2018 году).

Істотна скараціўся й аб’ём беларускага экспарту нафтапрадуктаў – на 13,8 % да 1 мільёну тон. Пры гэтым у грашовым вымярэньні аб’ёмы паставак скараціліся на 14,9 % – да 482,4 мільёнаў даляраў ЗША. Асноўнымі спажыўцамі прадукцыі беларускай нафтаперапрацоўкі сталі Вялікая Брытанія, Нідэрлянды і Ўкраіна.

Аб’ёмы экспарту беларускай нафты захаваліся на ранейшым узроўні – 138 тысячаў тон, аднак аб’ём атрыманай ад экспарту выручкі насупраць, скараціліся – на 13,4 %, да 58,13 мільёнаў даляраў ЗША.

belsat.eu/аз