У студыі каналу замежнага вяшчаньня Польскага радыё – спэцыяльны госьць. Ім зьяўляецца намесьнік міністра замежных спраў Польшчы Шыман Шынкоўскі вэль Сэнк.
Міністэрства замежных спраў Польшчы пачало падрыхтоўку да адзначэньня 80-й гадавіны пачатку Другой сусьветнай вайны. Гаворыцца, што гэта будзе падзея на высокім міжнародным узроўні з удзелам сусьветных палітыкаў, у тым ліку прэзыдэнта ЗША Дональда Трампа.
Шыман Шынкоўскі вэль Сэнк: Канцылярыя прэзыдэнта Польшчы выслала запрашэньні да вядомых палітыкаў у сьвеце. Цяпер чакаем адказаў зь іх боку, таму пакуль што рана казаць, хто прыедзе на гэтае важнае мерапрыемства. Яно асабліва важнае для нас, палякаў, таму што ў сьвеце, на жаль, ня ўсе ведаюць, што Другая сусьветная вайна пачалася 1 верасьня 1939 году нападам Нямеччыны менавіта на Польшчу. Такім чынам адзначэньне з удзелам важных асоб міжнароднай палітычнай сцэны дапамагло б пашырыць гістарычныя веды на гэтую тэму ў сьвеце.
Арганізацыяй адзначэньня займаецца Канцылярыя прэзыдэнта Польшчы, але пры нагодзе гэтай даты МЗС нашай краіны правядзе акцыю пад назвай «Першыя ў барацьбе», мэта якой – нагадаць цэламу сьвету пра тое, хто першым прыняў на сябе нямецкую агрэсію. Гэта будзе кампанія на ангельскай мове ў традыцыйных СМІ ды ў сацыяльных сетках. І мы спадзяёмся, што праз нашы дыппрадстаўніцтвы гэтая інфармацыя разыдзецца па ўсім сьвеце.
У чэрвені будзе арганізаваны польска-нямецкі круглы стол з удзелам прадстаўнікоў дзьвюх дзяржаў, а таксама меншасьцяў – польскай у Нямеччыне й нямецкай у Польшчы. Якая мэта гэтай сустрэчы?
Шыман Шынкоўскі вэль Сэнк: Я лічу, што заўсёды трэба размаўляць, каб пытаньні палякаў за мяжой прасоўваць наперад. На жаль, калі казаць пра польска-нямецкія адносіны, то ў апошні час яны перажываюць свайго роду застой. Прыкладам могуць быць менавіта сустрэчы за круглым сталом, прысьвечаныя польска-нямецкім адносінам, якія раней мелі рэгулярны характар, а цяпер апошняя прайшла ў 2015 годзе.
Сустрэч не было, бо ў нас складвалася ўражаньне, што не існуе канструктыўнай атмасфэры, якая б спрыяла сустрэчам. У апошнія месяцы назіраецца зацікаўленьне нашых нямецкіх партнэраў да перамоў. Мне здаецца, што падыход нямецкага боку зьмяніўся дзякуючы таму, што мы стараліся іх пераканаць у важнасьці перамоў. Паводле мяне, нямецкія партнэры зразумелі, што нельга вырашыць важныя пытаньні ўзаемаадносін без вырашэньня пытаньня правоў польскай нацыянальнай меншасьці ў Германіі.
Такім чынам, у другой палове чэрвеня пачнуцца працы круглага стала. Нам удалося ўзгадніць тры важнейшыя тэмы перамоў: навучаньне польскай мовы ў школах Нямеччыны, будаўніцтва Польскага дому ў горадзе Бохум і рознага роду спрэчныя гістарычныя пытаньні, напрыклад, адкрыцьцё помніка польскім ахвярам Другой сусьветнай вайны ў Бэрліне.
Польшча адкрывае новы тэлеканал TVP Wilno. Гэта адмысловы канал, які будзе вяшчаць на польскай мове спэцыяльна для палякаў на Віленшчыне. Тэлеканал уваходзіць у структуры дзяржаўнага польскага тэлебачаньня TVP.У вялікай ступені летувіскія палякі сочаць за тым, што адбываецца ў сьвеце, па расейскіх СМІ. Ці ў такім выпадку стварэньне новага тэлеканалу – гэта дзяржаўны інтарэс Польшчы?
Шыман Шынкоўскі вэль Сэнк: Так, сапраўды, дзякуючы тэлеканалу мы пастараемся стаць супрацьвагай для расейскамоўнай прапаганды, таму што СМІ ў краінах Балтыі інтэнсіўна выкарыстоўваюцца для прасоўваньня расейскага пункту гледжаньня. Нам жа хочацца, каб палякі, якія жывуць у Летуве, мелі доступ да польскамоўных СМІ й да СМІ, якія расказваюць пра Польшчу. Мы будзе расказваць пра гісторыю, пра традыцыі, а таксама пра сёньняшні дзень у Польшчы й Летуве. Гэтым будзе займацца каманда польскіх журналістаў, якія жывуць у Летуве й добра ведаюць мясцовую рэчаіснасьць. Я пазнаёміўся з гэтай камандай: гэта група энэргічных і таленавітых людзей.
Ужо ў траўні мы зможам убачыць першыя перадачы TVP Wilno, а восеньню заплянаваны паўнавартасны старт каналу.Згаданы праект удалося рэалізаваць дзякуючы супрацы паміж МЗС і дзяржаўнымі польскімі СМІ. Гэта, дарэчы, не адзіны супольны праект, бо ўжо існуе ангельскамоўная праграма «Focus on Poland», якая стартавала на пачатку бягучага году. Згаданыя праекты – гэта прыклад супрацы розных дзяржаўных устаноў і інстытутаў у імя польскага дзяржаўнага інтарэсу.
размаўляла Галіна Остас/вс
слухайце далучаны гукавы файл