Грэцыя запатрабуе ў Нямеччыны выплаты ваенных рэпарацый

Улады Грэцыі зьвернуцца да Нямеччыны з афіцыйным патрабаваньнем выплаты рэпарацый за страты панесеныя падчас Другой сусьветнай вайны. Рашэньне па гэтай справе ўчора ўвечары прыняў грэцкі парлямэнт. Згаданае рашэньне падтрымалі як дэпутаты кіруючай партыі, так і апазыцыі. Тым часам Бэрлін лічыць, што няма ніякіх падставаў для гэткіх патрабаваньняў.

Гаворка ідзе пра фінансавую кампэнсацыю матэрыяльных стратаў, кампэнсацыі для ахвяр і іх сем'яў, вяртаньне акупацыйнай пазыкі, якую Грэцыя была вымушана даць немцам і выкрадзеных твораў мастацтва.

Выступаючы ў грэцкім парлямэнце прэм'ер Алексіс Цыпрас падкрэсьліў, што патрабаваньне ваенных рэпарацыяў у Нямеччыны – гэта гістарычны й маральны абавязак, які краіна павінна выканаць.

Спэцыяльная парлямэнцкая камісія ацаніла страты, панесеныя Грэцыяй падчас нямецкай акупацыі ў каля 300 мільярдаў эўра.

аз