Logo Polskiego Radia
Print

Праваслаўныя і грэка-католікі сьвяткуюць Вялікдзень

PR dla Zagranicy
Viktar Korbut 28.04.2019 11:01
У Польшчы праваслаўныя кампактна пражываюць у Падляскім ваяводзтве, многія зь іх беларусы.
Велікоднае богаслужэньне ў грэка-каталіцкім саборы ў ПшэмысьліВелікоднае богаслужэньне ў грэка-каталіцкім саборы ў ПшэмысьліФота: PAP/Darek Delmanowicz

Хрэсны ход вакол храма і звон званоў апоўначы абвясьцілі аб пачатку сьвята Ўваскрэсеньня Хрыстовага ў праваслаўнай, а таксама грэка-каталіцкай (уніяцкай) царкве.

У Польшчы праваслаўныя кампактна пражываюць у Падляскім, Люблінскім ваяводзтвах, грэка-католікі на паўднёва-ўсходніх тэрыторыях, многія зь іх зьяўляюцца беларусамі, украінцамі.

Вялікая праваслаўная абшчына знаходзіцца ў Варшаве. Тут некалькі праваслаўных храмаў, у т.л. сабор сьвятой Марыі Магдаліны, дзе праходзяць галоўныя ўрачыстасьці Вялікадня.

У сталіцы Польшчы знаходзіцца таксама галоўны грэка-каталіцкі сабор Польшчы.

Сьвяшчэньнікі сымбалічна адчынілі дзьверы храма крыжам, урачыста абвясьціўшы: «Хрыстос уваскрэс — сапраўды ўваскрэс!». Пазьней вернікі прынялі ўдзел у велікодных ютрані і літургіі.

Пасьля набажэнстваў праваслаўныя селі пры велікодным сьняданьні, якое пачынаецца са спажываньня яек і ежы, асьвячоных у Вялікую суботу. На стале пераважаюць мясныя і малочныя прадукты, бо ад іх спажываньня многія вернікі ўстрымліваліся на працягу 40-дзённага посту, які папярэднічаў Вялікадню.

Вялікдзень для адзінокіх арганізавала Брацтва сьвятога Мікалая ў Беластоку. Сьвята пачалося а 12.00 у Цэнтры праваслаўнай культуры на вул. Сьвятога Мікалая, 3.

У першы дзень Вялікадня ў цэрквах ў другой палове дня адпраўляецца велікоднае богаслужэньне — Вялікая вячэрня. У саборы сьвятога Мікалая ў Беластоку богаслужэньне пачалося а 14:00. Яго ўзначаліў архіепіскап Беластоцка-Гданьскі Якаў.

Уваскрэсеньне Гасподняе называюць сьвятам сьвят, яно зьяўляецца самай важнай падзеяй у літургічным годзе праваслаўнай царквы. Велікодны пэрыяд доўжыцца 40 дзён да сьвята Ўзьнясеньня Гасподняга.

IAR/вк

Print
Copyright © Polskie Radio S.A Пра нас Кантакт