Крымінальная справа па факце гібелі аленяў

wikipedia.pl

Праваахоўныя органы распачалі крымінальную справу па факце гібелі ў Докшыцкім раёне Віцебскай вобласьці 41 высакароднага эўрапейскага аленя, паведаміў агенцтву "Інтэрфакс-Захад" у суботу старшыня Докшыцкага райвыканкама Алег Пінчук.

"Па факце гібелі жывёл распачатая крымінальная справа, ідзе рассьледаваньне й разгляд", - сказаў Пінчук.

"Для правядзеньня аналізу ўзятыя ўнутраныя органы загінулых жывёл. Узята проба з малога кішэчніка й страўніка. Узятыя пробы кармоў, якімі сілкаваліся жывёлы. Сёньня чакаем заключэньня ўсіх лябараторый і высноў спэцыялістаў", - адзначыў старшыня райвыканкама.

Алег Пінчук не выключае, што да атручваньня жывёл могуць быць датычныя браканьеры.

"Я схільны да таго, што гэта злачынства маглі зьдзейсьніць браканьеры. У нас у раёне распачата шмат крымінальных спраў за браканьерства, у тым ліку і ў дачыненьні да менчукоў", - сказаў ён. "Хацелі адпомсьціць людзям, а загінулі ні ў чым невінаватыя жывёлы", - дадаў суразмоўца агенцтва.

Інтэрфакс/ав