"Дыялёг аб мадэрнізацыі Беларусі" абмеркаваны ў Брусэлі

Эўракамісар па пытаньнях пашырэньня і палітыкі добрасуседзтва Штэфан Фюле спадзяецца, што афіцыйны Менск возьме актыўны ўдзел у рэалізацыі ініцыятывы "Дыялёг аб мадэрнізацыі Беларусі". Пра гэта ён заявіў у Брусэлі на сустрэчы з прадстаўнікамі беларускай грамадзянскай супольнасьці — каардынатарамі ініцыятывы.

Як паведамляе прэс-служба Фюле, на сустрэчы абмяркоўваліся прыярытэты мадэрнізацыі Беларусі і шляхі іх дасягненьня, а таксама ўмовы працы няўрадавых арганізацый у краіне.

Фюле "ўзяў пад увагу" прапановы ўдзельнікаў сустрэчы, якія датычацца судовай, сацыяльнай і эканамічнай рэформ.

Ён таксама падкрэсьліў важнасьць падтрымкі грамадзянскай супольнасьці ў Беларусі як аднаго з прыярытэтаў ЭЗ. "Дыялёг аб мадэрнізацыі зьяўляецца вельмі добрым прыкладам, які паказвае, што грамадзянская супольнасьць гатовая зрабіць важны ўнёсак у мадэрнізацыю краіны, — адзначыў Фюле. — Я спадзяюся, што беларускія ўлады заўважаць гэтую гатоўнасьць і зробяць свой ўнёсак у гэты дыялёг. Я лічу, што гэта важны інструмэнт для падрыхтоўкі неабходных рэформ па мадэрнізацыі краіны".

БелаПАН/эб