КДБ не раскрывае вынікаў сьледзтва аб “плюшавым дэсанце”

Камітэт дзяржаўнай бясьпекі Беларусі завяршыў расьсьледаваньне справы аб "плюшавым дэсанце", паведаміў журналістам у пятніцу ў Менску першы намесьнік старшыні КДБ Ігар Сяргеенка.

У той жа час ён адмовіўся ад камэнтароў аб тым, зь якімі вынікамі завершана расьсьледаваньне й які далейшы лёс гэтай справы й яго фігурантаў.

Як нагадвае агенцтва “Інтэрфакс”, 4 ліпеня 2012 года лёгкаматорны грамадзянскі самалёт, якім кіравалі два грамадзяніны Швэцыі, перасёк з боку Летувы паветраную прастору Беларусі й раскідаў над Менскам і Івянцом плюшавых мішак з заклікамі да свабоды прэсы ў краіне.

У лютым стала вядома, што Гарадзенскі міжгарнізонны ваенны суд прысудзіў да двух гадоў пазбаўленьня волі з адбываньнем пакараньня ў калёніі ўзмоцненага рэжыму пагранічніка ў званьні прапаршчыка, які ня паведаміў аб парушэньні дзяржаўнай мяжы швэдскім самалётам.

дг/Інтэрфакс