АМАП зьняў удзельнікаў грамадзка-спартовага мерапрыемства з-за маек

Менскі сталічны фэстываль бегу «Кубак выкліку» праходзіў пад патранажам зорак беларускага спорту — бягуньні Аліны Талай, прызёркі чэмпіянату Эўропы і плыўчыхі Аляксандры Герасімені, прызёркі Алімпійскіх гульняў.

У фэстывалі прымалі ўдзел каманды моладзі, студэнцкіх арганізацый, а таксама каманды журналістаў.

Сваіх прадстаўнікоў на «Кубак выкліку» даслаў і калектыў сайту Серабранка.бай, кіраўніком якога зьяўляецца Кірыл Жываловіч. Бегуны, апрануты ў кашулькі з партрэтамі палітвязьня Міколы Статкевіча, спачатку атрымалі свае стартавыя нумары. Але за 15 хвілінаў да старту да іх падышло прыкладна сямёра амапаўцаў, якія папрасілі журналістаў прайсьці зь імі.

Фэстываль бегу «Кубак выкліку» праходзіў на лыжаролернай трасе ў сталічнай Вясьнянцы. Падчас мерапрыемства зьбіраліся сродкі на дапамогу паралімпійскаму чэмпіёну Атэнаў-2004 Аляксандру Трыпуцю. Нядаўна ён атрымаў траўму, якая ледзь не каштавала яму жыцьця.

яс/euroradio.fm