Беларуская дэлегацыя правяла шэраг перамоў у Габоне
PR dla Zagranicy
Anna Zadrożna
14.11.2013 15:18
Яе ачольваў намесьнік міністра замежных спраў Валянцін Рыбакоў.
12-13 лістапада ў межах візыту ў Рэспубліку Габон дэлегацыі Беларусі на чале з намесьнікам міністра замежных спраў Валянцінам Рыбаковым адбыліся сустрэчы беларускай дэлегацыі зь кіраўніцтвам шэрагу міністэрстваў: прамысловасьці й шахтаў; аховы здароўя; абароны; эканомікі, занятасьці і ўстойлівага разьвіцьця; малога й сярэдняга прадпрымальніцтва, рамесьніцтва й гандлю.
Як паведаміла прэс-служба МЗС, падчас сустрэч абмяркоўваліся шляхі разьвіцьця двухбаковых гандлёва-эканамічных сувязяў, кантактаў у галіне аховы здароўя, адукацыі, турызму.
Адбыліся таксама перамовы беларускай дэлегацыі з прэзыдэнтам гандлёва-прамысловай палаты Габона. Праведзена кантактна-каапэрацыйная біржа з удзелам габонскіх дзелавых колаў.
Прадстаўнікі РУП „Менскі трактарны завод” і ААТ „Менскі аўтамабільны завод” правялі прэзэнтацыі вытворчых і экспартных магчымасьцяў сваіх прадпрыемстваў. Адбыўся шэраг сустрэч з бізнэсмэнамі Габона.
Паводле вынікаў візыту дасягнута дамоўленасьць аб наведваньні Беларусі ў 2014 годзе дэлегацыяй дзелавых колаў Габона з мэтай падбору камэрцыйных партнэраў, абмену вопытам у сфэры дрэваапрацоўкі, агра- і экатурызму, разьвіцьця двухбаковай дагаворна-прававой базы, прапрацоўкі іншых пэрспэктыўных кірункаў беларуска-габонскага супрацоўніцтва.
БелаПАН/аз