Малы памежны рух з Польшчай?

„Вялікая дыпляматыя павінна працаваць у інтарэсах канкрэтных людзей”, - кажа прафэсар Беларускага Дзяржаўнага ўнівэрсытэта Уладзімір Снапкоўскі.

Так ён камэнтуе пытаньне ўвядзеньня малога памежнага руху паміж Беларусьсю й Польшчай. Пры гэтым ён адзначае, што пакуль не стаіць пытаньне ратыфікацыі адпаведнага пагадненьня, хоць яно было падпісанае яшчэ ў 2010 годзе. „Тут ёсьць шэраг момантаў, невыгодных беларускаму боку”.

„Цяпер цэны ў Польшчы ніжэй, чым у Беларусі. І калі адкрыць малы памежны рух, то гэта створыць пэўныя цяжкасьці для беларускай эканомікі: будуць увозіць тавары, прадукты харчаваньня й г.д. Тут паўстае пытаньне, наколькі дзяржава будзе здольная рэгуляваць гэтыя працэсы. Тут пытаньне філясофскае: ці дзяржава дасьць магчымасьць сваім грамадзянам зарабляць, ці нейкім чынам выкарыстоўваць гэтыя магчымасьці на розьніцы цэн? Але гэта будзе выклік для нацыянальнай гаспадаркі”, - кажа прафэсар Снапкоўскі.

“Пакуль Беларусь не гатова афіцыйна да гэтага, трэба рыхтавацца”, - дадае ён.

Малы памежны рух дае магчымасьць грамадзянам памежных тэрыторый перасякаць мяжу бязь візы, а толькі атрымаўшы адпаведны дазвол. Цяпер падобная дамова дзейнічае паміж Беларусьсю й Латвіяй.

racyja.com/аз