Украінскі браканьер абстраляў беларускіх памежнікаў

Украінскі браканьер з паляўнічай стрэльбы абстраляў беларускі пагранічны патруль. Паведаміў прэс-сакратар Дзяржаўнага пагранічнага камітэта Беларусі Аляксандр Цішчанка.

Паводле яго, інцыдэнт здарыўся 13 сьнежня прыблізна ў 14.00 у Столінскім раёне на ўчастку Пінскага пагранічнага атрада.

Падчас абходу мяжы патруль знайшоў сьляды парушальніка, якія вялі на беларускую тэрыторыю, а крыху пазней - і дваіх парушальнікаў.

Пры спробе затрыманьня адзін з мужчын адкрыў агонь па памежніках з паляўнічай стрэльбы, пасьля чаго апошнія былі вымушаны прымяніць зброю.

У выніку інцыдэнту ніхто не пацярпеў. Той, хто страляў, затрыманы, яго спадарожніка шукаюць. Затрыманы, паводле яго слоў, зьяўляецца грамадзянінам Украіны й пранік у Беларусь для паляваньня на дзіка. У дачыненні да яго будзе распачата крымінальная справа.

БелаПАН/nn.by/аз