Беларусы баяцца беднасьці й не давяраюць апазыцыі

Амаль палова беларусаў, ацэньваючы сваю цяперашнюю эканамічную сытуацыю, лічыць, што жыць цяжка, але можна яшчэ пацярпець.

Пра гэта сьведчаць вынікі сацыялягічнага дасьледаваньня грамадзкай думкі, праведзенага ў верасьні 2014 году сацыёлягамі Незалежнага інстытуту сацыяльна-эканамічных і палітычных дасьледаваньняў (НІСЭПД) шляхам апытаньня 1506 рэспандэнтаў.

34% апытаных лічаць, што „ўсё ня так кепска, можна жыць”, і толькі 15% выказаліся, што „цярпець наш гаротны стан ужо немагчыма”.

Ацэньваючы сацыяльную групу, да якой яны належаць, амаль 53 % паведамілі, што ім „грошай хапае на прадукты й вопратку, але купля рэчаў працяглага карыстаньня зьяўляецца праблемай”. Хапае грошай на прадукты, але нестае на адзеньне 25% апытаных.

43% рэспандэнтаў выказаліся, што больш за ўсё баяцца беднасьці, а страта здароўя выклікае неспакой ажно ў 62%. Грамадзянскай вайны баяцца 27% апытаных, замежнай агрэсіі — 20%, страты Беларусьсю незалежнасьці — 13%.

Тым часам адзначаецца падзеньне даверу да апазыцыі — 14% (у чэрвені было 15) і рост даверу да дзяржаўных СМІ — 39% (у чэрвені было 33).

Адказваючы на пытаньне „Ці разумее беларуская апазыцыя праблемы і клопаты такіх людзей, як вы?”, 59% апытаных адказалі „не”, 21% — „так”. Год таму гэтыя лічбы склалі 56 і 24% адпаведна.

Вынікі апытаньня пра нізкі давер да апазыцыі перагукаюцца з ранейшым апытаньнем Незалежнага інстытуту сацыяльна-эканамічных і палітычных дасьледаваньняў, згодна зь якім рэйтынг Лукашэнкі вырас на фоне падзей ва Ўкраіне.

svaboda.org/аз