Лукашэнка наладжвае масты ў Грузію

Аляксандар Лукашэнка сустрэўся са старшынём урада Аджарыі Арчылам Хабадзэ. Пра гэта паведаміла прэсавая служба беларускага лідара.

Кіраўнік беларускай дзяржавы прапанаваў гэтаму рэгіёну супрацоўніцтва ў машынабудаваньні, будаўніцтве, турызме. "Лічу, што мы знойдзем у вас сваё месца й вы ніколі не прад'явіце нам прэтэнзій", - сказаў беларускі кіраўнік.

Аляксандар Лукашэнка зьвярнуў увагу, што ў Беларусі вельмі разьвітая машынабудаўнічая сфэра. Беларускі бок гатовы прапанаваць любыя паслугі будаўнічага комплексу й паставіць любую тэхніку: ад сельскагаспадарчай да камунальнай.

Беларускі бок разьлічвае на тое, што Аджарыя стала за апошнія гады адным з найбольш разьвітых рэгіёнаў ня толькі Грузіі, але й чарнаморскага ўзьбярэжжа. Аджарыя ўносіць у ВУП Грузіі больш за мільярд даляраў. Рэгіён зрабіў уражваючы рывок у турыстычнай сфэры, зазначыў Лукашэнка.

Афіцыйны Менск хацеў бы скарыстацца гэтым досьведам.

юл