Мікалай Дзядок нанёс сабе раны жывата й рук

Як паведаміла праваабаронцам „Вясны” жонка палітзьняволенага Валерыя Хоціна, Мікалая Дзядка 12 траўня перавялі ў новае месца адбыцьця пакараньня - у калёнію ПК-9 у Горках. А ўжо на другі дзень, 13 траўня ён быў зьмешчаны ў штрафны ізалятар, дзе правёў 5 сутак. Літаральна праз дзень, 19 траўня, яго зноў адправілі ў адзіночку штрафнога ізалятара. З-за вельмі нізкай тэмпэратуры Дзядок вельмі пакутаваў усю ноч, прасіўся ад пераводзе ў іншае памяшканьне.

Урэшце рэшт, каб зьвярнуць увагу дзяжурных па ШІЗА, раніцай 20 траўня Дзядок нанёс сабе рэзаныя раны жывата й рук, пасьля чаго быў зьмешчаны ў мэдсанчастку. Пасьля аказаньня першай мэдычнай дапамогі, Дзядка ізноў накіравалі ў тое ж халоднае памяшканьне ШІЗА, дзе ён знаходзіўся да 26 траўня. Па словах Валерыі Хоцінай, агулам Дзядок атрымаў за гэты непрацяглы час 4 спагнаньні.

Мікалай Дзядок адбыў 4,5 гады зьняволеньня за нібыта хуліганскія дзеяньні ў дачыненьні да афіцыйных будынкаў і павінен быў выйсьці на волю 3 сакавіка 2015 году. Аднак 26 лютага суд Ленінскага раёна Магілёва асудзіў палітвязьня па артыкуле 411 Крымінальнага кодэкса „злоснае непадпарадкаваньне патрабаваньням адміністрацыі” да 1 году зьняволеньня ў калёніі строгага рэжыму. 30 красавіка суд касацыйнай інстанцыі пакінуў гэты прысуд у сіле.

spring96.org/аз