Ян Чыквін узнагароджаны мэдалём Францішка Скарыны

Старшыня Беларускага літаратурнага аб'яднаньня „Белавежа” ў Польшчы, паэт і перакладчык, гісторык літаратуры Ян Чыквін узнагароджаны мэдалём Францішка Скарыны. Цырымонія ўручэньня гэтай дзяржаўнай узнагароды адбылася на мінулым тыдні ў Бельску Падляскім, паведамілі ў прэс-службе Міністэрства замежных спраў Беларусі.

Мэдаль Францішка Скарыны Чыквіну ўручыў беларускі пасол у Польшчы Аляксандр Авяр'янаў, які прыбыў з афіцыйным візытам у Падляскае ваяводзтва.

Дыплямат прыняў удзел у „Бельскіх артыстычных сустрэчах”, арганізаваных уладамі ваяводзтва ў каапэрацыі з адміністрацыяй Кобрына (Берасьцейская вобласьць).

На гэтым мерапрыемстве Авяр'янаў абмеркаваў з ваяводам Падляшша Багданам Пашкоўскім і бургамістрам БельскаПадляскага Яраславам Бароўскім пытаньні польска-беларускага супрацоўніцтва ў галіне гандлю, інвэстыцый, адукацыі, культуры й турызму.

Падчас візыту беларускага амбасадара абмяркоўваліся таксама пытаньні памежнага й міжрэгіянальнага супрацоўніцтва, рэалізацыі трансгранічных праектаў у межах праграм Эўразьвязу з прадстаўнікамі мясцовага самакіраваньня Гайнаўкі. У гэтым жа горадзе дыплямат паўдзельнічаў у адкрыцьці мастацкай выставы беларускага авангарду, якая была падрыхтаваная Нацыянальным цэнтрам сучасных мастацтваў.

Беларускі пасол таксама ўзяў удзел у 10-й каляднай сустрэчы „Бяседа з князем”, якую арганізаваў фонд імя князя Канстанціна Астрожскага.

На заканчэньне свайго візыту дыплямат сустрэўся са старшынёй Беларускага грамадзка-культурнага таварыства ў Беластоку Янам Сычэўскім і абмеркаваў зь ім пытаньні падрыхтоўкі да 60-годзьдзя гэтага аб'яднаньня, якое адбудзецца 27 лютага.

belapan.com/аз