Гурту Brutto не дазволілі выступіць у Менску 27 траўня

Улады Менска не далі гурту Сяргея Міхалка Brutto дазвол на правядзеньне канцэрту ў Палацы спорту 27 траўня, патлумачыўшы гэта правядзеньнем мантажна-дэмантажных работ пасьля выступу расейскай групы «Зьвяры», якое пройдзе напярэдадні.

«Сказалі, каб мы выбіралі іншую дату. Ад ідэі правядзеньня канцэрта ў Менску мы не адмаўляемся – зараз узгадняем іншую дату», – паведаміў парталу Tuzin.fm прадусэр групы Антон Азізбекян.

На днях Сяргей Міхалок апублікаваў чарговы відэазварот, у якім распавёў, што сталічныя ўлады чакаюць гурт Brutto з канцэртамі й запрасілі яго разам з сямʼёй вярнуцца на радзіму. Лідар гурта выказаў надзею, што канцэрт Brutto ў Менску абавязкова адбудзецца.

Раней Сяргей Міхалок папрасіў чыноўнікаў Міністэрства культуры дазволіць выступ у «Менск-Арэне» й паабяцаў усе атрыманыя ад канцэрта грошы ахвяраваць сталічнаму Дому міласэрнасьці й дому інвалідаў.

Тэлеграф/ав