Актывісты выступілі ў абарону парку Котаўка ў Менску

Экалягічныя актывісты выступілі ў абарону парку Котаўка ў раёне сельгаспасёлку, разьмешчанага ў Менску паміж вуліцамі Максіма Багдановіча і Леаніда Бяды, дзе зьбіраюцца высекчы дрэвы для будаўніцтва касьцёла. 19 траўня ў парку прайшла акцыя, удзельнікі якой заклікалі захоўваць зялёныя зоны ў гарадах, паведаміла прэс-служба экалягічнага таварыства «Зялёная сетка».

«Гэтаму парку прыкладна 55-60 гадоў. Сапраўды, парк даўно не чысьцілі і ён патрабуе догляду, але гэта не азначае забудову і зьнішчэньне», – адзначыў каардынатар грамадзкай кампаніі «Гарадзкі лясьнічы» Ігар Корзун.

Як адзначаюць эколягі, у парку налічваецца больш за 10 відаў дрэў: татарскі, платанападобны і серабрысты клёны, ліпа, бальзамічная і пірамідальная таполі, ясень, каштан, бяроза, вяз, бэз, сьпірэя.

Як адзначыла прэс-служба «Зялёнай сеткі», для пабудовы касьцёла найбліжэйшым часам плянуецца высечы 49 дрэў. Узводзіць касьцёл будзе рэлігійная абшчына «Рымска-каталіцкая парафія сьвятых апосталаў Пятра і Паўла і сьвятога Яўгена дэ Мазенод». Пра тое, што ў парку высекуць дрэвы, мясцовыя жыхары даведаліся з абʼяў, якія зьявіліся на дрэвах.

Як паведаміў прадстаўнік абшчыны, будаўніцтва касьцёла было ўзгодненае яшчэ пяць гадоў таму. Грамадзкае абмеркаваньне праходзіла з 7 па 21 красавіка 2011 года.

БелаПАН/яс