Кожны год у Беларусі ўсынаўляюць каля 600 дзяцей

Сёлета беларускія сем'і ўжо ўсынавілі 425 дзяцей. Гэта на 9 больш, чым летась, распавяла дырэктар Нацыянальнага цэнтра ўсынаўленьня Міністэрства адукацыі Натальля Пасьпелава.

Паводле яе словаў, беларусы апошнім часам маюць вялікую цікавасьць да ўсынаўленьня. Штогод усынаўляюць каля 600 дзяцей. Што тычыцца міжнароднага ўсынаўленьня, дык са студзеня па верасень 2016 года 19 беларускіх дзяцей, якія засталіся без апекі бацькоў, былі перададзеныя ў італьянскія сем'і.

"Да канца года гэтая лічба павялічыцца ўдвая", — сказала Пасьпелава.

Таксама дырэктар цэнтра па ўсынаўленьні распавяла, што ў электроннай базе інфармацыйнага партала Dadomu.by зараз налічваецца 4022 хлопчыкі й дзяўчынкі, якія маюць патрэбу ў сям'і. Большасьць зь іх пражываюць у інтэрнатах. Аднак ёсьць і дзеці, якія выхоўваюцца прафэсійнымі бацькамі ў часовых сем'ях.

эўрарадыё/вс