Генпракуратура прыцягнула да дысцыплінарнай адказнасьці міністра культуры

Генэральнай пракуратурай праведзена праверка выкананьня заканадаўства, якое рэгулюе парадак ажыцьцяўленьня прадпрымальніцкай дзейнасьці пры выкарыстаньні абʼектаў гісторыка-культурнай спадчыны, адзначаецца ў паведамленьні ведамства.

У ходзе праверкі было выяўлена, што патрабаваньні заканадаўства ў поўнай меры не выконваліся, у тым ліку з прычыны неналежнага кантролю з боку кіраўніцтва Міністэрства культуры і мясцовых выканаўчых камітэтаў, адказных за яго рэалізацыю.

Нярэдка на фасадах гісторыка-культурных абʼектаў былі змантаваныя трубы, выцяжкі, прамысловыя кандыцыянеры, а на дахах – антэна-фідэрныя прылады электрасувязі кампаній, апэратараў сотавай сувязі. Аналіз сытуацыі паказаў, што адлічэньні ў выглядзе кампэнсацыі насілі адзінкавы характар і не былі зьвязаны з рэалізацыяй норм заканадаўства.

Па выніках разгляду актаў пракурорскага нагляду да дысцыплінарнай адказнасьці прыцягнуты міністар культуры Рэспублікі Беларусь.

Праведзены мерапрыемствы па ўстанаўленьні і ўліку субʼектаў гаспадараньня, дзейнасьць якіх аказвае непасрэднае ўзьдзеяньне на абʼекты гісторыі і культуры (у цяперашні час – больш за 2 тыс. плацельшчыкаў).

nn.by/яс