Грузія прапануе Беларусі праграму супрацы

4 верасьня пачаўся афіцыйны візыт у Беларусь міністра замежных спраў Грузіі ў рангу віцэ-прэмʼера Міхаіла Джанэлідзэ. Кіраўнік грузінскай дыпляматыі праводзіць перамовы зь беларускімі дыпляматамі, урадоўцамі й парлямэнтарамі. Заплянаваныя сустрэчы высокага ўзроўню, у тым ліку ва ўрадзе, у Нацыянальным сходзе і Міністэрстве замежных спраў.

Бакі будуць абмяркоўваць пытаньні двухбаковага супрацоўніцтва, актывізацыі гандлёва-эканамічнага ўзаемадзеяньня, разьвіцьця парлямэнцкіх сувязяў і рэалізацыі сумесных праектаў.

Па выніках перамоваў у МЗС плянуецца падпісаньне праграмы супрацоўніцтва паміж замежнапалітычнымі ведамствамі на 2018-2019 гады.

Згодна з афіцыйнай статыстыкай, у першым паўгодзьдзі 2017-га таваразварот Беларусі з Грузіяй перавысіў 53 мільёны даляраў і павялічыўся амаль на 30%. Пры гэтым прырост экспарту склаў 28% (45 мільёнаў даляраў), імпарт – на 25% (8,4 мільёна даляраў. Сальда дадатнае ў памеры 36 мільёнаў даляраў.

Паводле МЗС/Радыё «Свабода»/юл