Адхілена ад сваіх пасад усё кіраўніцтва Апэратыўна-аналітычнага цэнтру

У Беларусі адхілена ад сваіх пасад усё кіраўніцтва Апэратыўна-аналітычнага цэнтру. Гэтая спэцслужба зьяўляецца рэгулятарам інтэрнэту ў краіне. Пра нечаканую сытуацыю ў ААЦ было паведамлена 13 кастрычніка на нарадзе ў Аляксандра Лукашэнкі з удзелам кіраўнікоў сілавых структур.

Было заяўлена, што на даручэньне кіраўніка дзяржавы працавала камісія, якая вывучала дзейнасьць Апэратыўна-аналітычнага цэнтру й мае прэтэнзіі да яго кіраўніцтва, праводзіцца расьсьледаваньне выяўленых фактаў.

Службовыя асобы (начальнік ААЦ Сяргей Шпегун, намесьнікі Генадзь Бялкоў і Канстанцін Шульган) адхіленыя ад сваіх пасад да яго заканчэньня, інфармуе БелТА.

Таксама стала вядома, што Аляксандр Лукашэнка разгледзеў шэраг крымінальных спраў, якія ён трымае на асабістым кантролі. Ім былі разгледжаныя й апэратыўна-сьледчыя матэрыялы ў адносінах працы неназваных у паведамленьні кіраўнікоў рэспубліканскага й мясцовага ўзроўняў, супрацьпраўных дзеяньняў асобных праваахоўнікаў. Пра гэтыя факты й ішла гаворка на нарадзе.

Лукашэнка адзначыў, што перад тым, як прымаць рашэньні, хацеў бы паслухаць меркаваньні прысутных сілавікоў.

эўрарадыё/вс