Улады хочуць перанесьці шэсьце да ўгодак Слуцкага чыну з цэнтра

Слуцкі райвыканкам прапанаваў новы маршрут шэсьця на адзначэньне гадавіны Слуцкага збройнага чыну, абгрунтаваўшы неабходнасьць разьмяшчэньнем арганізацыяў гандлю і рамонтам музэя.

Угодкі Слуцкага збройнага чыну плянуецца адзначыць 25 лістапада. Сярод заяўнікаў мерапрыемства – старшыня Партыі БНФ Рыгор Кастусёў, намесьнік старшыні Руху «За Свабоду» Юрый Меляшкевіч, сябра Сойму Партыі БНФ Павел Батуеў і сябра Рады Руху «За Свабоду» Вольга Быкоўская.

«У сувязі з рамонтам краязнаўчага музэя, разьмяшчэньнем арганізацый гандлю мы прапануем іншае месца збору», – сказаў кіраўнік аддзела па ідэалёгіі й па справах моладзі райвыканкама Міхаіл Верабей Вользе Быкоўскай.

Па прапанове райвыканкама ўдзельнікі могуць сабрацца на стаянцы ля гарадзкога стадыёна, прайсьці шэсьцем па ходніках да парку й там правесьці мітынг.
Паводле заяўнікаў, мясцовыя ўлады адмыслова ствараюць праблему, каб схаваць шэсьце й каб акцыя прайшла незаўважана для жыхароў горада.

радыё рацыя/вс