Міністэрству абароны не спадабаліся прапановы па барацьбе з дзедаўшчынай

На сайце Міністэрства абароны Беларусі зьявіўся адказ на прапановы руху «Гавары праўду» па паляпшэньні ўмоваў тэрміновай вайсковай службы. Прапановы не спадабаліся.

Нагадаем, што лідары «гавары праўду» высунулі наступныя прапановы: вызваліць вайсковых псыхолягаў ад загружанасьці бюракратычнай працай; стварыць апякунскія рады пры кожнай частцы з удзелам вэтэранаў і прадстаўнікоў бацькоў вайскоўцаў4 даць вайскоўцам выбіраць прадстаўніка для рашэньня побытавых і прававых пытаньняў; камплектаваць падразьдзяленьні вайскоўцамі аднаго пэрыяду службы (каб не сутыкаліся «малодшыя» і «старэйшыя» – «дзяды»); вызваліць ад крымінальнай адказнасьці за самавольнае пакіданьне вайсковай часткі празь дзедаўшчыну; падумаць пра скарачэньне працягласьці тэрміновай вайсковай службы да 9 месяцаў; зладзіць па-за войскам тэлефонную лінію падтрымкі для вайскоўцаў або ўвесьці пасаду вайсковага амбудсмэна ды іншыя. Па словах Тацьцяны Караткевіч, усе прапановы былі абвергнутыя.

Тым ня меней, яна мяркуе, што «крытыка – гэта першы крок да дыялёгу» – і добра, што прапановы «Гавары праўду» крытыкуюць публічна. Паводле Караткевіч, можна сказаць, што цягам гэтага году грамадзянская супольнасьць дабілася трох перамогаў над Мінабароны: тыя прызналі некаторыя праблемы, зьмянілі палітыку ў публічных дачыненьнях і сталі больш «падсправаздачнымі» у мэдыйнай прасторы. Таму дыялёг зь імі варта працягваць.

Радыё Свабода/нг