Human Constanta зладзіла ў Берасьці фэст для ўцекачоў з Паўночнага Каўказу

Праваабарончая арганізацыя Human Constanta зладзіла ў Берасьці фэст для ўцекачоў з Паўночнага Каўказу. Актывісты зладзілі мерапрыемства для тых, хто апынуўся ў складанай сытуацыі: не атрымаў прытулку ў Эўразьвязе ды застаўся на беларускім памежжы.

«Вось гэтым фэстывалем мы спрабуем (...) разьвязаць праблему ксэнафобіі, непаразуменьняў паміж рознымі культурамі», – кажа суарганізатар фэсту Аляксей Талстоў.

У Берасьці ўжо некалькі гадоў знаходзяцца ўцекачы з Паўночнага Каўказу. Некалькі сотняў тых, каго не пусьцілі праз польскую мяжу, вымушана затрымаліся ў Берасьці.

«Тут у Берасьці мы працуем з людзьмі з Чачніі і Дагестану, людзьмі з расейскім грамадзянствам, і за ўвесь час Беларусь не надала формы міжнароднай абароны людзям, і таму адзіная магчымасьць ратавацца – бегчы ў іншыя краіны, таму Беларусь для іх – транзытная тэрыторыя», – кажа праваабаронца Наста Лойка.

- Каб гэта быў ня толькі транзыт, а краіна сяброўства, і каб вымушаныя малыя мігранты маглі забыцца на праблемы ды пабавіцца са сваімі аднагодкамі ў прыязнай атмасфэры, і паўстала пляцоўка «Фэст сяброўства». А яшчэ – каб кожны, хто хоча дапамагчы, здолеў гэта зрабіць, – заяўляюць арганізатары.

Інтэграцыйны «Фэст сяброўства» арганізацыя Human Constanta зладзіла ў супрацы з агенцтвам рэгіянальнага разьвіцьця «Дзедзіч».

belsat.eu/яс