У Менску разьвітваюцца з Алесем Ліпаем

У Менску разьвітваюцца з Алесем Ліпаем – журналістам, паэтам, заснавальнікам і дырэктарам першага недзяржаўнага інфармацыйнага агенцтва БелаПАН. Жалобная цырымонія адбываецца ў рытуальнай залі на вуліцы Альшэўскага.

Першапачаткова плянавалася, што разьвітаньне адбудзецца ў суботу ўвечары ў Сьвята-Міхайлаўскім праваслаўным прыходзе, аднак пазьней сваякі памерлага вырашылі перанесьці цырымонію на Альшэўскага, бо храм мог не зьмясьціць усіх, хто захацеў бы прыйсьці.

Пасьля разьвітаньня труну зь целам перавязуць у Рудзенск, дзе журналіста пахаваюць побач з маці й сястрой.

Алесь Ліпай памёр 23 жніўня, яму было 52 гады. Апошнім часам ён сур’ёзна хварэў.

эўрарадыё/вс