У Гомелі склалі пратакол на аўтарку дакумэнтальнага фільму

У Гомелі ў дачыненьні да журналісткі-фрылансеркі Марыі Булавінскай-Ляпінай склалі адміністрацыйны пратакол за «незаконны выраб і распаўсюд прадукцыі СМІ».

Пратакол склаў супрацоўнік АУС Цэнтральнага раёну Гомлю А. Гусеў, паведамляе «Гомельская вясна».

Журналістку вінавацяць у стварэньні фільму «Бяздомны горад» пра зьнішчэньне драўлянай забудовы ў Гомелі, які здымаўся па замове Белсата. Журналістка выступала як аўтарка і рэжысёрка фільма.

«У фільме праілюстраваныя высілкі гараджанаў па захаваньні старых дамоў. Лічу, што ўлады ініцыявалі судовы працэс менавіта ўбачыўшы за сабою славу «Герастратаў» – людзей, якія пазбавілі стары горад суцэльнага пласта ўнікальнай архітэктуры», - пракамэнтавала Марыя Булавінская-Ляпіна.

яс/Белсат