У Беларусі звыш 3 тыс. актыўных прыхільнікаў нацызму і нэанацызму

Міністэрства ўнутраных спраў зафіксавала ў Беларусі больш за тры тысячы «актыўных прыхільнікаў нацызму і нэанацызму», заявіў 6 сьнежня на паседжаньні Палаты прадстаўнікоў кіраўнік МУС Ігар Шуневіч.

Ён падкрэсьліў, што пры гэтым трэба ўлічваць «пэўную лятэнтнасьць», але «задакумэнтавана» была менавіта такая колькасьць чалавек. «Для Беларусі гэта вельмі шмат», – дадаў Шуневіч.

Паводле яго слоў, прыхільнікамі нэанацызму ў пераважнай большасьці зьяўляюцца людзі да 40 гадоў, «маргінальнага складу, нежанатыя, бязьдзетныя, непрацаўладкаваныя, часам злоўжываюць алькаголем і наркотыкамі». «Як правіла, яны вылучаюцца павышанай агрэсіўнасьцю і жорсткасьцю», – сказаў міністар унутраных спраў.

Многія з гэтых людзей зьведалі адміністрацыйную і крымінальную адказнасьць, частка з іх цяпер знаходзіцца ў месцах пазбаўленьня волі, паведаміў ён. «Многія з іх – гэта былыя ці дзейныя фанаты футбольных клюбаў, так званыя скінгэды. Яны прытрымліваюцца ідэалёгіі нацысцкай Германіі, выступаюць за перавагу белай нацыі і расы. Асабліва яны пакланяюцца часьцям вэрмахта, якія былі на тэрыторыі Рэспублікі Беларусь і адрозьніваліся асаблівай жорсткасьцю. Яны колюць сабе масьці гэтых часьцей і гэтак далей», – расказаў Шуневіч.

БелаПАН/нг