Лічбавая эканоміка стала часткай нацыянальнай стратэгіі Беларусі

Пра гэта заявіў віцэ-прэм'ер Ігар Петрышэнка на міжнародным эканамічным форуме «СНД: лічбавая эканоміка – плятформа інтэграцыі».

Беларускі чыноўнік падкрэсьліў, што важнейшым крокам у лічбавізацыі краіны стаў дэкрэт прэзыдэнта «Аб разьвіцьці лічбавай эканомікі», падпісаны ў сьнежні 2017 года. З яго прыняцьцем былі створаны ўмовы для дынамічнага разьвіцьця IT-сфэры, атрыманы ўнікальныя канкурэнтныя перавагі для прыцягненьня тэхналёгій, інвэстыцый, а таксама вядучых спэцыялістаў і кампаній з усяго сьвету, рэзыдэнты якіх могуць у льготным падатковым і прававым рэжыме адкрываць свае прадстаўніцтвы і працаваць у буйнейшым IT-клястары Усходняй Эўропы – беларускім Парку высокіх тэхналёгій.

Віцэ-прэмʼер канстатаваў, што ў Беларусі праводзіцца сыстэмная работа па разьвіцьці электроннага ўрада, разьвіваецца сыстэма прадстаўленьня дзяржаўных электронных паслуг грамадзянам і бізнэсу, ствараецца Беларуская інтэграваная сэрвісна-разьліковая сыстэма. Ён таксама нагадаў, што ў 2018 годзе Беларусь паднялася на 38-е месца ў рэйтынгу ААН па ўзроўні разьвіцьця электроннага ўрада (United Nations E-Government Survey 2018), перамясьціўшыся на 11 радкоў уверх у параўнаньні з вынікамі 2016 года.

Паводле Белта/юл