Ганна Канапацкая накіравала дэпутацкія запыты з-за сытуацыі ў Курапатах

Дэпутат Палаты прадстаўнікоў Ганна Канапацкая патрабуе ад Міністэрства лясной гаспадаркі й Міністэрства культуры падаць дакумэнты, якія пацьвярджаюць законнасьць работ у Курапатах.

Адпаведныя дэпутацкія запыты Канапацкая накіравала 5 красавіка міністру лясной гаспадаркі Віталю Дрожжу й культуры Юрыю Бондару.

У першым звароце Канапацкая просіць міністра даць зьвесткі пра заказчыка работ, іх аб'ёме і тэрмінах правядзеньня, а таксама дакумэнты, якія пацьвярджаюць выкананьне заказчыкам патрабаваньняў Дзяржаўнай інспэкцыі па ахове гісторыка-культурнай спадчыны.

У звароце на імя міністра культуры парлямэнтар таксама запытвае дакумэнты, якія могуць пацьвердзіць патрабаваньні дзяржінспэкцыі.

4 красавіка Ганна Канапацкая была ў Курапатах і на месцы падзей запатрабавала ў дырэктара Бараўлянскага спэцлясгасу Аляксандра Мірановіча паказаць дакумэнты, на падставе якіх вядуцца работы, у тым ліку дазвол ад Мінкультуры на іх правядзеньне, паколькі Курапаты зьяўляюцца гісторыка-культурнай каштоўнасьцю. Аднак Мірановіч адмовіўся гэта зрабіць, накіраваўшы яе ў прэс-службу міністэрства.

naviny.by/вс