У Беларусь прыбыў першы амбасадар Паўночнай Карэі

У беларускай сталіцы прайшла сустрэча намесьніка міністра замежных справаў Беларусі Андрэй Дапкюнаса з першым амбасадарам Карэйскай Народнай Дэмакратычнай Рэспублікі Джу Чон Бонам з нагоды яго прыбыцьця ў краіну.

Як паведаміў беларускі МЗС, размова тычылася «стану і пэрспэктыў разьвіцьця двухбаковых стасункаў, а таксама супрацы ў міжнародных арганізацыях». Беларускі бок павітаў рашэньне КНДР накіраваць у Беларусь першага ў гісторыі двухбаковых адносін амбасадара, і пажадаў прадстаўніку Паўночнай Карэі посьпехаў на адказнай пасадзе. Падчас сустрэчы амбасадар перадаў намесьніку міністра копіі даверных грамат.

Амбасада КНДР адкрылася ў Менску два з паловай года таму, але да нядаўняга часу ў Беларусі быў толькі часовы павераны з Паўночнай Карэі.

Гандлёвы абарот паміж Беларусі і КНДР пакуль вельмі нізкі, таксама амаль адсутнічаюць палітычныя адносіны. На міжнароднай арэне Беларусь вітала правядзеньне саміту КНДР з Рэспублікай Карэя, і заклікала Паўночную Карэю спыніць ядзерныя выпрабаваньні і запускі ракетаў.

Паводле Белта/Радыё «Свабода»/юл