Logo Polskiego Radia
Print

Лукашэнка павіншаваў з Днём Перамогі прэзыдэнтаў Украіны

PR dla Zagranicy
Jolanta Śmiałowska 08.05.2019 16:11
Лукашэнка даслаў віншаваньні таксама лідэрам Армэніі, Грузіі, Азэрбайджану і Кыргызстану.
Аляксандр Лукашэнка, архіўнае фотаАляксандр Лукашэнка, архіўнае фотафота: прэс-служба кіраўніка Беларусі

Аляксандр Лукашэнка з нагоды 74-й гадавіны Перамогі зьвярнуўся да грамадзянаў Беларусі, а таксама накіраваў віншаваньні замежным лідэрам. Сярод іх, акрамя Уладзіміра Пуціна, дзейны прэзыдэнт Украіны Пятро Парашэнка і новаабраны – Уладзімір Зяленскі.

Як паведамляе прэс-служба кіраўніка дзяржавы, Лукашэнка даслаў віншаваньні лідэрам Армэніі, Грузіі, Азэрбайджану, Кыргызстану ды іншым, а таксама шэрагу «бачных дзеячаў» і кіраўнікам інтэграцыйных аб’яднаньняў.

Зьвяртаючыся да беларусаў, ён адзначыў:

«Дзявятае траўня – сьвятая дата для кожнага беларуса. Дзень, які вярнуў нашаму народу права на жыцьцё і надзею на будучыню. Мы паважаем гераізм і бясстрашнасьць абаронцаў Айчыны, якія верылі ў перамогу, мужна змагаліся за Радзіму. Высока цэнім самаадданасьць працаўнікоў тылу і ўсіх, хто ў пасьляваенныя гады ўздымаў з руін разбураныя гарады і вёскі. Вялікая Перамога аб'ядноўвае пакаленьні, служыць прыкладам стойкасьці і патрыятызму для моладзі, натхняе на стварэньне».

Паводле словаў Лукашэнкі, «захаваць памяць аб подзьвігу нашага народа – гістарычны абавязак перад мінулым і будучыняй».

8 траўня 1945 году адбылася капітуляцыя нацысцкай Нямеччыны ў Другой сусьветнай вайне. На постсавецкай прасторы Дзень перамогі адзначаецца 9 траўня, бо, паводле маскоўскага часу, акт аб безумоўнай капітуляцыі набыў моц ад 00:01 9 траўня 1945 году. Другая сусьветная вайна цалкам завяршылася 2 верасьня з капітуляцыяй Японіі.

Belsat.eu/яс

Print
Copyright © Polskie Radio S.A Пра нас Кантакт