У Беларусі зьявілася анлайн-плятформа для абмену ведамі

У Беларусі запусьцілі сайт Mentor.by, дзе можна адшукаць майстар-клясы і курсы на абсалютна любыя тэмы, а таксама самому запрапанаваць сябе як рэпэтытара ці трэнэра.

«Стварыць такі праект натхніў асабісты недахоп у мэнтары, у нейкіх рэальных і кампэтэнтных парадах, які перасьледаваў мяне ўсё жыцьцё», – кажа заснавальнік плятформы Кірыл Анохін.

Mentor.by задумваўся як зручнае месца для абмену ведамі. На сайце можна ствараць аб’явы трох тыпаў:

– «Хачу навучыцца». Патрэба можа быць якая заўгодна – ад «рана прачынацца» да «паглыбіць веды ў атамнай фізыцы».

– «Магу навучыць». Расказваеце, які курс, кансультацыю ці трэніроўку гатовы правесьці і на якіх умовах.

– «Падзея». Паведамляеце пра адукацыйную імпрэзу, якая хутка адбудзецца: бізнэс-форум, лекцыя, дыскусія.

У каталёгу абвесткі разьбіты па катэгорыях: дзеці і сям’я, дызайн, прыгажосьць і здароўе, мастацтва, бізнэс і фінансы ды іншыя.

Пакуль большасьць прапанаваных курсаў тычацца моў, ІТ і школьных прадметаў. Але пляцоўка працуе толькі месяц.

Паводле Наша ніва/юл