Што можна Д. Вусу?

Экс-кандыдата ў прэзыдэнты Дзьмітрыя Вуса сёньня выклікалі ў камісію па крымінальных пакараньнях пры Ленінскім РУУС Менска, дзе палітыку паведамілі аб умовах кантролю за ім.

„Сказалі, што паводле крымінальнага заканадаўства яны абавязаныя паставіць мяне на прафіляктычны ўлік. Я падпісаў паперы, што буду падаваць інфармацыю, калі зьбяруся выехаць за межы Беларусі. Мяне таксама папярэдзілі аб недапушчальнасьці ўдзелу ў масавых мерапрыемствах", – сказаў Дзьмітры Вус.

Яму таксама паведамілі, што ў любы час да яго з праверкай могуць прыйсьці супрацоўнікі міліцыі.

У сувязі з папярэджаньнем з нагоды ўдзелу ў масавых мерапрыемствах Вус паведаміў, што разважае, ці будзе ён прысутнічаць 8 кастрычніка на Народным сходзе.

Дзьмітры Вус, прызнаны вінаватым у арганізацыі масавых беспарадкаў у Менску 19 сьнежня 2010 году й асуджаны на пяць з паловай гадоў пазбаўленьня волі ў калёніі ўзмоцненага рэжыму, быў вызвалены ўвечары 1 кастрычніка на падставе ўказу Аляксандра Лукашэнкі аб памілаваньні.

БелаПАН/аз