Па дазвол да сьвятога Панцеляймона

Слонімскі доктар Іван Шэга ўжо не адзін месяц спрабуе зарэгістраваць грамадзкую інфармацыйную ўстанову для пацыентаў „Панцеляймон” у гонар сьвятога Панцеляймона.

Нагадваем, сьвяты вялікамучанік Панцеляймон дапамагае пазбаўляцца ад цялесных і духоўных хвароб.

Гэта ўстанова бясплатна давала б слонімцам розныя кансультацыі па мэдыцыне, па юрыдычных пытаньнях, зьвязаных з лячэньнем і платнымі мэдыцынскімі паслугамі й г.д.

Але доктар ніяк не можа прайсьці першы этап рэгістрацыі. Каля 15 розных адмоўных адказаў Іван Шэга атрымаў з Гродна з аддзела па вядзеньні Адзінага дзяржаўнага рэгістра Гродзенскай вобласьці.

У апошнім адказе намесьнік начальніка аддзела А.В.Губановіч таксама даў адмоўны адказ, паведаміўшы, што „ў назве ўстановы не дапускаюцца ўласныя імёны асоб, калі яны не супадаюць зь імёнамі заснавальнікаў і заснавальнікі не атрымалі дазволу такіх асоб”. Выходзіць, што па дазвол Івану Шэгу неабходна зьвяртацца да сьвятога Панцеляймона.

spring96.org/аз