Зьмітра Дашкевіча паўторна зьмясьцілі ў штрафны ізалятар глыбоцкай калёніі на 10 сутак, паведаміла нявеста Дашкевіча Наста Палажанка.

Паводле яе слоў, аб паўторным зьмяшчэньні ў ШІЗА Дашкевіч паведаміў адвакату падчас сустрэчы, якая адбылася ўчора.

Сустрэча праходзіла пад пільным кантролем супрацоўнікаў калёніі, таму ён ня змог сказаць, за што зноў зьмешчаны ў ізалятар.

Апошнім разам Дашкевіча пакаралі зьмяшчэньнем у ШІЗА за адмову ўваходзіць у камэру да зьняволенага зь нізкім сацыяльным статусам, гэтак званага «апушчанага». «Па турэмных правілах, гэта аўтаматычна перавяло б самога Дашкевіча ў такі ж статус», — сказала Палажанка.

Нагадаем, Дашкевіч быў затрыманы ў Менску за дзень да прэзыдэнцкіх выбараў, 18 сьнежня 2010 году. Ён быў прызнаны вінаватым у зьбіваньні двух мінчан. 24 сакавіка 2011 году суд прыгаварыў Дашкевіча да двух гадоў пазбаўленьня волі ў калёніі агульнага рэжыму.

Яс/БелаПАН