Малы памежны рух зь Летувой?

МЗС Беларусі дашле ноту ў адказ летувіскаму МЗС пра гатоўнасьць да запуску спрошчанага пераходу мяжы жыхарамі памежных рэгіёнаў пасьля канчатковага тэставаньня сыстэмы.

Пра гэта заявіў на брыфінгу ў Менску прэсавы сакратар МЗС Беларусі Андрэй Савіных. Ён патлумачыў, што падрыхтоўчая праца носіць міжведамасны характар, і таму трэба прасачыць усе аспэкты памежнага руху.

Паводле словаў афіцыйнага прадстаўніка зьнешнепалітычнага ведамства, „Беларусь і Летува знаходзяцца ў дастаткова высокай ступені гатоўнасьці для запуску спрошчанага рэжыму перасячэньня дзяржаўнай мяжы”.

Андрэй Савіных таксама дадаў, што беларускі бок у гэтай працы „ўлічвае латыскі досьвед”.

Латвія — першая краіна Эўразьвязу, зь якой ужо дзейнічае пагадненьне аб спрошчаным перасячэньні мяжы жыхарамі памежных рэгіёнаў. Таксама павінны ўступіць у дзеяньне падобныя пагадненьні зь Летувой і Польшчай.

svaboda.org/аз