Гарадзенскія студэнты зь візытам у Беластоку

Цягам бягучага тыдня студэнты беларускай філялёгіі Гарадзенскага ўнівэрсытэта знаёмяцца зь Беластокам. Па запрашэньні катэдры беларускай філялёгіі Ўнівэрсытэта ў Беластоку група студэнтаў з Гародні ўжо чарговы раз наведвае Падляшша.

Як адзначыла старшая выкладчыца катэдры беларускай літаратуры Гарадзенскага Ўнівэрсытэта Сьвятлана Грымота, такі візыт вельмі важны для будучых філёлягаў.

„Гэта канешне паглыбленьне ведаў у многіх галінах, пра беларускае жыцьцё ў Беластоку ў першую чаргу, пра літаратуру, што асабліва важна для студэнтаў”, - сказала яна.

У межах візыту гарадзенскіх студэнтаў адбываюцца сустрэчы зь беларускімі літаратарамі й навукоўцамі.

Візыты студэнтаў адбываюцца папераменна ў Беластоку й Гародні штогод. У будучым годзе студэнты з Беластока наведаюць горад над Нёманам.

Беларускае Радыё Рацыя/аз