Puls Biznesu: Міністраў праслухоўвала мафія альбо расейскія спэцслужбы

Польскія журналісты лічуць, што чальцоў польскага ўраду маглі падслухоўваць бізнэсмэны, якія займаюцца нелегальным гандлем вугалем, альбо расейскія спэцслужбы. Такія вэрсіі агучыў аўтар журналісцкага расьсьледаваньня ў газэце “Puls Biznesu” Марэк Навацкі.

Польскія спэцслужбы ўжо арыштавалі ўладальніка самай вялікай польскай фірмы, якая займаецца гандлем вугалю. Падазраецца, што ён нелегальна імпартаваў у Польчшу танны расейскі вугаль, а затым прадаваў яго ці рээкспартаваў пад выглядам польскага. Кампрамат на польскіх палітыкаў усплыў, калі ўрад пачаў змагацца з “вугальнай мафіяй”. Мэтай кампрамату магла быць адстаўка міністра ўнутраных справаў і сілавікоў, якія з гэтай мафіяй змагаліся.

Прыгадаем, што “скандал з праслухоўкай” выбухнуў у Польшчы ў сярэдзіне чэрвеня, пасьля таго, як буйны польскі часопіс “Wprost” апублікаваў запісаныя ў варшаўскім рэстаране размовы ключавых асобаў польскай дзяржавы. Міністры ў фрывольнай манеры раскрывалі сакрэты ўнутранай і зьнешняй палітыкі дзяржавы.

IAR/ап