Польшча неўзабаве пачне капаць канал праз Балтыйскую касу

Паводле слоў міністра, рэалізацыя будаўніцтва суднаходнага каналу праз Балтыйскую касу адпавядае законам, і няма ніякіх прычын, каб спыняць працу. Ён паведаміў, што ў канцы красавіка будзе вядомы інвэстар. Супраць каналу выступае Расея і шукае прыхільнікаў у гэтай справе ў Эўрапейскай камісіі.

Міністар Грубарчык адзначыў, што Эўразьвяз ня ставіць пад сумнеў будаўніцтва каналу. Цяпер ужо вядуцца падрыхтоўчыя работы для інвэстыцыі.

М.Грубарчык: Для дзеяньняў, якія мы распачалі, не патрабуецца дазвол Эўрапейскай камісіі. 24 красавіка галоўны інвэстар, то бок, Марское ўпраўленьне ў Гдыні, выбярэ падрадчыка для будаўнічых работ, і пачынаем будаўніцтва.

Будаўніцтва суднаходнага канала праз Балтыйскую касу ставіць за мэту скарачэньне маршрута з Калінінградзкага (Вісьлінскага) заліву ў Балтыйскае мора на 100 км.

Канал спросьціць доступ да порта ў Эльблонгу і адтуль да Балтыйскага мора. Праект прадугледжвае абыход Балтыйскага праліву, які знаходзіцца пад кантролем Расеі.

Канал праз Балтыйскую касу будзе мець даўжыню 1,3 км і 5 мэтраў глыбіні. У выніку ў порт у Эльблёнгу змогуць заходзіць судны з апусканьнем да 4 мэтраў.

Будаўніцтва суднаходнага канала праз Балтыйскую касу працягнецца да 2022 года. Кошт інвэстыцыі ацэньваецца на 880 мільёнаў злотых (200 млн эўра), сума будзе цалкам пакрывацца з дзяржаўнага бюджэту.

яс