Беларусы ўдзельнічаюць у сьвяткаваньні 450-годзьдзя Люблінскай уніі

1 ліпеня спаўняецца 450-годзьдзе Люблінскай уніі, якая прывяла да аб’яднаньня ў адну дзяржаву Каралеўства Польскага і Вялікага княства Літоўскага. У сувязі з гэтым 30 чэрвеня ў Любліне праходзіць сустрэча кіраўнікоў парлямэнтаў краін Усходняй Эўропы. Гэта адно зь мерапрыемстваў да 450-годзьдзя Люблінскай уніі.

Станіслаў Карчэўскі, сьпікер Сэната Польшчы, адзначыў: «Гэта важная сустрэча, неабходная для таго, каб мы абмеркавалі нашу гісторыю, наша мінулае, а таксама будучыню».

У сустрэчы прымаюць удзел сьпікеры Сэйма і Сэната Рэспублікі Польшча, прэм'ер-міністар Рэспублікі Польшча, старшыня Сэйма Літвы, а таксама высокапастаўленыя чыноўнікі і госьці зь Літвы, Беларусі, Украіны, Латвіі, Эстоніі, Чэхіі і Вугоршчыны.

Урачыстасьці пачаліся з імшы ў люблінскім катэдральным касьцёле а 10 гадзіне. Пасьля набажэнства госьці ўсклалі кветкі да помніка Люблінскай уніі на Літоўскай плошчы. Затым у Цэнтры сустрэчы культур адбылося пасяджэньне парлямэнцкай асамблеі Польшчы і Літвы. Тут жа прайшла дыскусія «450-годзьдзе Люблінскай уніі. Эўрапейскае значэньне спадчыны Люблінскай уніі для сучасных нацый і дзяржаў».

Таксама адбылася прэзэнтацыя памятнай паштовай маркі да 450-годзьдзя Люблінскай уніі.

Урачыстасьці завершыць канцэрт, на якім выступяць калектывы з Польшчы, Украіны, Літвы, Латвіі і Беларусі.

IAR/вк